Challenging the teaching of research methodologies in pursuit of epistemic and social justice in South Africa

Abstract

Bana ba thari ya Afrika Borwa ba tšeyetšwe mabu a bona. Kamogo ye ya naga yešo ebile ka marumo mola thuto ya bathupi ba naga ba go tšwa moše wa mawatle e be e laetša gabotse gore ntwa ebe ese ya swanela go fegwa. Bathupi ba rile go fenya ba hlalosa gore ba ithwešitše “tokelo ya phenyo”. Go ya ka bona, tokelo ye e ba fa maatla a bofenyi. Maatla a ba netefatša ka wona gore bafengwa ba tla phela ka mokgwa yo bafenyi ba ratang ka gona. Le ge ba fentšwe, ba bangwe ba bana ba thari ya Afrika Borwa ba sa ganana le “tokelo ya phenyo” moka le ditlamorago kamoka tša yona tšeo di gananago le toka. Ba ema ka la gore; ke bona maganagofengwa gomme ba sa lwela gore mabu a boele matsogong a bona. Ba tšwelapele ka la gore “tokelo ya phenyo” ga e kwane le phedišano magareng ga batho go ya ka mophelelo wa tša setho. Taodišo ye ya rena e mabapi le sebakwa segolo se. Thuta phishegelo-bothlale ke wona motheo wa rena go fetleka sebakwa se. Re netefatša gore, botho bo ema ka la gore lefase le swanetše go boela go beng’mabu gomme “tokelo ya phenyo” le ditlamorago ka moka tša yona tšeo di gananago le toka, di phumulwe ka moka. Se se bolela gore le thuto ya dinyakisiso lefapheng la tsa semoya didibeng tsa thuto ye e phagamego nageng ya Afrika Borwa e tshwanetse go lebelelwa sefsa gomme e fetlekiwe. Phetleko ya rena e ema ka la gore: thuto ya semoya e swanetše go ela tlhoko bongaka bja setšo gore thuto ye e be yona motlhala wa tokologo ya thuto kamoka bokgobeng bja “tokelo ya phenyo”.